"Ауыл мектебін колдайық" атты қайырымдылық іс-шарасы аясында «Назарбаев Зияткерлік мектептері» дербес білім беру ұйымының Шымкент қаласындағы «химия-биологиялық бағыттағы Назарбаев Зияткерлік мектебі» филиалының ұйымдастыруымен 2020 жылғы 21 тамызда Түркістан облысы Мақтарал ауданының «Жаңа жол» ауылдық округіне қарасты «Жеңіс» ауылында орналасқан № 20 Қ.Мүсірепов атындағы жалпы орта мектебінің 434 оқушысына мектеп формасы мен мультимедиялық кабинетті жабдықтауға арналған жаңа үлгідегі 18 компьютер және Өргебас ауылында орналасқан  №22 Қ.Аманжолов атындағы жалпы орта мектебінің 289 оқушысына мектеп формасы мен  мультимедиялық кабинетті жабдықтауға арналған жаңа үлгідегі 18 компьютерді  сыйға тартты.

 

Сондай-ақ ұлы ақын Абай Құнанбаевтың 175 жылдық мерейтойы қарсаңында М. Әуезовтың Абай жолы кітабын, жаңартылған мазмұнда оқыту бойынша әдістемелік-оқу құралдарын да сыйға тартып,  ауыл мектебінің кітапхана қорын толықтырды.

Игі іске «Назарбаев Зияткерлік мектептері» дербес білім беру ұйымының басқарма төрайымы Күләш Ноғатайқызы Шамшидинова бас қала – Нұр – Сұлтан қаласынан келіп қатысып, ауыл тұрғындары мен мектеп оқушыларына жылы лебізін білдірді.

 

Басқарма төрайымы К.Шамшидинова «Ел іші аман болсын!», еліміз аман, бірлігіміз бар болса қандай қиындық болса да бірге жеңеміз, қазақ деген халық - ниеті түзу халықпыз ғой, «Алтау ала болса ауыздағы кетеді, төртеу түгел болса төбедегі келеді» деп, жанға қуат сыйлайтын қанатты сөздер айтып, ауыл тұрғындары мен мектеп ұжымы, ата-аналарға, оқушыларға жігер-қайрат беретін сөздерімен 2020-2021 оқу жылының қарсаңында жаңа серпін, жаңа күш-қуат сыйлады.

 

Аталған іс-шараға «Назарбаев Зияткерлік мектептері» дербес білім беру ұйымының орталық баспасөз қызметінің өкілі М. Алипинова, «Назарбаев Зияткерлік мектептері» дербес білім беру ұйымының Шымкент қаласындағы «химия-биологиялық бағыттағы Назарбаев Зияткерлік мектебі» филиалы директоры Б.Касимов, осы мектеп директорының орынбасары М.Есжанов және «Назарбаев Зияткерлік мектептері» дербес білім беру ұйымының жанындағы Педагогикалық шеберлік орталығының Шымкент қаласындағы филиалының директоры Ж.Калгинбаева қатысты.

 

«Өргебас» ауылы тұрғындары атынан көп балалы ана Айман Батырбекова және Жеңіс ауылы тұрғындарының атынан зейнеткер ұстаз, әрі ардақты әже Сәрсенкүл Ақтөреева шынайы алғыстарын айтып, ризашылық білдірді.