СӘТ САПАР, ЖАС ТҮЛЕК!

2021-2022 оқу жылының аяқталуына орай Түркістан облысы Мақтаарал ауданының адами әлеуетті дамыту бөліміне қарасты барлық білім беру ұймдарында соңғы қоңырау мерекесі жоғары деңгейде аталып өткізілді.

Ағымдағы жылы пайналануға берілген "Қ. Мүсірепов атындағы №20 жалпы орта мектебі" коммуналдық мемлекеттік мекемесінде 25 мамыр күні ұйымдастырылған арнайы мерекелік іс-шара көтеріңкі көңіл күйде өтті. Аталған іс-шараға Мақтаарал ауданының әкімі Б. Асанов тiкелей қатысып, ауданның барлық ұстаздары мен оқушыларын, ата-аналарын айтулы мерекемен құттықтады.

"Сіздерді соңғы қоңырау салтанатты шарасымен шын жүректен құттықтаймын! Бұл – қызығы мен қиыншылығы мол, қайталанбас балалықтың бал дәуренін артқа тастап, үлкен өмірге жолдама алатын аяулы сәт. Бүгін сыңғырлаған соңғы қоңырау үні балалардың есейгенін көріп көз жасына ерік берген ата-ана үшін де, шәкірттерін қимастықпен шығарып салар ұстаздар қауымы үшін де, олармен қоса толқып тұрған оқушылар үшін де ерекше" - деді Бақыт Насырханұлы өз құттықтау сөзiнде.

Жалпы ауданымыздағы мектеп қабырғасында 28117 оқушы тәлім алса, оның ішінде 1928 оқушы оқу жылын аяктаайды, үздік аттестатқа 124, алтын белгіге 84 үміткеріміз бар. Сонымен қоса 1264 оқушымыз Ұлттық бірыңғай тестілеуге қатысуға ниет білдірді. 9 сынып бітіруші түлектеріміз саны 2449 болса, оның 226-сы үздік аттестатқа үміткер. Осы оқу жылында аудан ұстаздары мен оқушылары облыстық, республикалық байқаулар мен олимпиадаларға және спорттық сайыстар мен іс шараларға қатысып, аудан абыройын асқақтатуға өз үлестерін қосты.

Сонымен қатар жиын барысында ауданның адами әлеуетті дамыту бөлімінің басшысы М.Серікбаев, "Нұр шамы" ЖШС-нің басшысы Сырым Жүсіпов, Халықаралық "Алаш" әдеби сыйлығының иегері Сабырбек Олжабай, адами әлеуетті дамыту бөлімінің әдістемелік кабинетінің меңгерушісі У.Исламова өздерінің ыстық ықыластарын білдіріп, түлектерге алдағы өмірлеріне сабақ болар құнды кеңестерін айтты.

Айта кететін жағдай, аудан, адами әлеуетті дамыту бөлімі және мектеп басшылары - мектеп қабырғасын аттағалы тұрған түлектердің әрбірінің жеке дара қолын алып, оларға алдағы емтихандарда мүдірмей өтулеріне және болашаққа қадам басып жатқан жаңа өмірлерінің жарқын болуына тiлек білдірді. Іс-шара соңы бітіруші түлектердің концерттік бағдарламасымен жалғасты.