САЛАУАТТЫ ҰРПАҚ БОЛАШАҒЫМЫЗДЫҢ КЕПІЛІ

 

            2022 жылдың 10 маусым күні Мақтаарал ауданы Мырзакент кентіндегі Қажымұқан Мұңайтпасов атындағы орталық стадионында Мақтаарал ауданының адами әлеуетті дамыту бөліміне қарасты білім беру ұйымдарының 9,10,11 сынып оқушылары арасында кіші футболдан Мақтаарал ауданының біріншілігінің ақтық финалы өтті.

           

        Біріншіліктің алғашқы кезеңі барысында кенттердегі және ауылдық округтердегі орналасқан мектептер  арасында іріктеу жарыстары өткізілді. Осы кезеңнен жүлделі І және ІІ орын иеленген командалар 2 кезеңге яғни ақтық финал ойындарына жолдама алып, соның нәтижесінде  24 команда іріктелді. Жарыс Қазақстан Республикасының футбол федерациясының бекіткен ережесіне сәйкес жеребе тастау арқылы 6 топқа бөлініп жарысқа түсті. Әр топтан І және ІІ орын алған командалар ширек финалда ойнады.     

 

        Мақтаарал ауданының біріншілігінің ақтық финалына өткен командаларға аудан әкімі Бақыт Асанов, аудандық соттың төрағасы Құнанбай Мұсаев, аудандық адами әлеуетті дамыту бөлімінің басшысы Мұратбек Серікбаев командаларға сәттілік тілеп, жарысты ресми түрде ашық деп жариялады.

 

         "Білімді, тәрбиелі әрі дені сау ұрпақ – ұлттың ең қымбат байлығы. Олай болса, балалар мен жасөспірімдерге білім берумен қатар, өнер үйретіп, спортпен шұғылдандырып, жан-жақты жетілуіне қолайлы жағдай жасау – мемлекеттің басты міндеті. Балаларымыз - біздің, ұлтымыздың жалғасы. Олар - болашақ еліміздің, жеріміздің иесі. Сондықтан, бүгін Мақтаарал ауданында өтіп жатқан футболдан мектеп оқушылары арасындағы жарыстың мақсаты да сол - дені сау ұрпақты қалыптастыру әрі оларға патриоттық тәрбие беру. Баршаңызды бүгінгі жарыстың ашылуымен құттықтай отырып, сәттілік серіктеріңіз болсын деп тілек білдіремін. Жеңістен жеңіске жете беріңіздер!" - деді Бақыт Насырханұлы.

 

        «Балалар жылы» аясында 1 маусым күнінен бастау алған білім беру ұйымдарының 9,10,11 сынып оқушылары арасында кіші футболдан Мақтаарал ауданының біріншілігінің чемпионаты өз мәресіне жетті.

 

       Жарыстың жеңімпаз командасы бас кубокқа ие болды. Сайыс қорытындысы бойынша, бірінші орынды Т.Әубәкіров атындағы №43 жалпы орта мектебінің командасы жеңіп алды, екінші орынды С.Айни атындағы №55 жалпы орта мектебінің командасы иеленсе, ал үшінші орын Мырзакент мектеп гимназиясына бұйырды. Сондай-ақ турнир жеңімпаздарын ұйымдастырушылар және демеушілер тарапынан «Үздік ойыншы», «Үздік қақпашы», «Үздік қорғаушы», «Үздік шабуылшы» және «Үздік гол» номинациялары бойынша марапатталды.